1 маусымнан Қазақстандағы қалалар арасында блок-бекеттер алынып, 5 маусымнан автобустар қатынай бастайды деп хабарлайды QazPulse тілшісі Орталық коммуникация қызметінен.
Индустрия және инфрақұрылымдық даму министрлігі Көлік комитеті төрағасының орынбасары Жәнібек Тайжановтың айтуынша, ведомствоаралық комиссия осындай шешімге келген.
Осы орайда, автобуспен жолаушылар тасымалдауда, Бас санитарлық дәрігердің талаптары ескеріледі. Мұнда бағдарға жіберілетін автобуста залалсыздандыру жұмыстарын жүргізу, жолаушыларды тек медициналық бетпердемен кіргізу, 1 метр қашықтықты сақтау, жүргізушілерді резеңке қолғаппен және бетпердемен қамтамасыз ету қарастырылған.
«Бұл дегеніңіз, облыс, қалалардың арасында өз автокөлігіңізбен де қатынай аласыз», – деді Денсаулық сақтау министрлігі Көліктегі бас санитарлық дәрігер Сәдуақас Байғабылов.
Әкімдіктер болса, індеттің таралмауын мақсат тұтқан тиісті шаралардың сақталуын назарда ұстауы тиіс.
Сонымен қатар, жаздың алғашқы күнінен жолаушылар пойыздары жүріп, халықаралық әуе рейстері де біртіндеп жанданбақ. Бірінші кезекте Оңтүстік Корея, Қытай және Әзірбайжан елдеріне ден қойылса, екінші кезеңде Германия, Тайланд, Түркия, Біріккен Араб Әмірліктері және Чехия мемлекеттеріне қатысты іс-шаралар атқарылады деп жоспарланып отыр.
«Алайда, бұл рейстер ертең ашылады деген сөз емес. Сәйкес елдердегі авиациялық мекемелермен келісіп барып, нақты халықаралық бағдарлар іске қосылатын уақытты қосымша хабарлаймыз. Мысалы Сыртқы істер министрлігіндегі әріптестеріміз, әр елдегі азаматтардың жүріп-тұруы тұрғысындағы шектеулерге байланысты мемлекеттік шекарадан өту жайын талқылайды», – деді ҚР Индустрия және инфрақұрылымды дамыту министрлігі Азаматтық авиация комитетінің төрағасы Талғат Ластаев.
