2020 жылғы 12 тамызда Қазақстан Республикасы Парламенті Сенатының депутаттарын сайлау өтеді деп хабарлайды QazPulse тілшісі. Бұл туралы Ақорда сайтында ҚР Президенті Қасым-Жомарт Тоқаевтың Жарлығы шықты.
Оның себебі ретінде, Қазақстан Республикасы Конституциясының 44-бабының 2) тармақшасына, «Қазақстан Республикасындағы сайлау туралы» 1995 жылғы 28 қыркүйектегі Қазақстан Республикасы Конституциялық заңының 69 бабына сәйкес, қазіргі сенаторлардың өкілеттігі ағымдағы жылдың қазан айында аяқталатындығы көрсетілген.
Сенатта 49 орын бар, 15-ін Президент тағайындаса, 34-інде облыстар мен республикалық мәндегі қалалардан және елордадан 2 адамнан сайланады.
30 жасқа толған, жоғары білімі мен кем дегенде 5 жыл жұмыс өтілі, Қазақстанда тұрақты тұрып жатқан азамат Сенат депутаты бола алады. Айтпақшы сенаторға бір уақытта Мәжіліс депутаты мәртебесін иеленуге тыйым салынған.
Сенаторларды Мәслихат депутаттары сайлайды.
