ҚР Президенті Қасым-Жомарт Тоқаев елдегі коронавирус індетінен опат болғандардың рухына тағзым ретінде 2020 жылғы 13 шілдені Жалпыұлттық аза тұту күні етіп бекітті. Осы орайда, бүгін, Нұр-Сұлтан уақыты бойынша сағат 12:00-де қауіпті дерт құрбандарын еске алу үшін бір минуттық үнсіздік жарияланады деп хабарлайды QazPulse тілшісі.
Бұл қаралы күнде ту түсіріліп, теле-радиоарналар эфир кестесін толықтай өзгертеді. Барлық ойын-сауық бағдарламалары, жарнама толығымен тоқтатылады. Бұрынғы кестеден тек ақпараттық бағдарламалар ғана рұқсат етіледі.
13 шілдедегі дерек бойынша Қазақстанда COVID-2019 сырқатына шалдыққандардың жалпы саны 60 мыңға жуықтаса, оның жартысынан астамы жазылып, өкінішке қарай 375 адам көз жұмды. Өкпе қабынуынан дүние салғандардың да қатары күрт көбейді.
Тәуелсіздік алған 1991 жылдан бері елімізде қаралы күн 9-шы рет жарияланып отыр. Алғашқы екеуінде Қарағанды облысында кеншілер қаза тапса, одан кейін Қызылағашта су бөгеті елдімекенді шайып кетіп, Арқанкергенде қайғылы жағдай орын алды. Шымкент пен Алматыда ұшақ құлаған соң, араға Ақтөбедегі лаңкестік оқиғаны салып, тағы да әуе көлігінің апаты елді дүрліктірді. Енді, міне, емі белгісіз ауру қаншама отбасыны қара жамылдырды.
