Үкімет отандық туризмді ынталандыру мақсатында ел ішінде ата-анасымен бірге ұшатын балалардың жолақысын өтеу жайын қарастыруда деп хабарлайды QazPulse тілшісі. Осы орайда аталған жеңілдікті 14 жасқа дейінгі балалардың қолдана алатыны хабарлануда. Сонда 1 ата-анаға 2 баладан есептегенде, толық әкесі мен шешесі 4 баланы тегін алып жүру мүмкіндігін иеленбек. Ал көпбалалы отбасыларда бір турөнімнен бес және одан да көп бала тасымалдануы ықтимал.
«Қазақстандықтарды ел ішінде демалуға ынталандыру үшін біз мектеп демалыс маусымында балаларға тегін ұшуға мүмкіндік беретін «Кids Go Free» жобасын субсидиялау ережелерін әзірледік. «Kids Go Free» тетігін іске асырудың оңтайлы сызбасы анықталып, оны іске асыруды қаржыландыру қажеттілігін есептеу әдістемесі әзірленді. «Kids Go Fre»e бағдарламасы сатып алынған туристік өнімге байланысты 2 жастан 14 жасқа (қоса алғанда) дейінгі балаларға арналады», – дейді «Kazakh Tourism» ҰК» АҚ басқарма төрағасының орынбасары Қайрат Сәдуақасов.
Бағдарлама шарттарының бірі – отбасы туристік аялдаған жерінде кемінде 5 күн, 4 түн тоқтауы тиіс.
Балалар туристік өнім бойынша ата-анасының біреуімен, баланың заңды өкілімен және/немесе ата-анасының жақын туысымен нотариалды куәландырылған сенімхат бойынша ұша алады.
«Аталған заң жобасы қазіргі уақытта Парламентте қарауда. Осыған байланысты «Kids Go Free» тетігін іске қосу 2021 жылы жоспарлануда», – дейді Қайрат Сәдуақасов.
Бұл шара азаматтардың демалысын 30%-ға дейін арзандатуға мүмкіндік бермек.
