42500 теңге әлеуметтік төлемінің тағайындалмағанына келіспейтін азаматтарға жаңа мүмкіндік беріліп отыр деп хабарлайды QazPulse тілшісі. Егер Төтенше жағдай (ТЖ) кезінде расында табыссыз қалдым деп санайтын болсаңыз және оны растайтын құжаттарыңыз болса, тұрғылықты жердегі штабқа жүгіне аласыз.
Осы орайда маңызды ескерту, Еңбек және халықты әлеуметтік қорғау министрлігі індет қаупі әлі де сейіле қоймағанын ескеріп, ұзын-сонар кезектер қалыптаспау үшін арыз-шағымдарды қабылдауды ағымдағы 2020 жылдың 1 желтоқсанына дейін созып отыр.
Сонымен, шағын және орта бизнес, ірі кәсіпкерлік (карантин енгізілген өңірлерде), коммерциялық емес заңды тұлғалар жұмыс беруші ретінде өтінішті тек әлеуметтік төлем тағайындаудан бас тарту (тоқтату) туралы шешім қабылданған қызметкерлер үшін береді.
Әлеуметтік төлемді тағайындаудан бас тарту (тоқтату) туралы шешім қабылданған жеке кәсіпкерлер (ЖК), жеке тәжірибемен айналысатын адамдар, бірыңғай жиынтық төлемді (БЖТ) төлеушілер, азаматтық-құқықтық сипаттағы шарттар (АҚС) бойынша жұмыс істейтін адамдар өтінішті өз бетінше дербес жазады.
Растайтын құжаттар тізбесі:
Қызметкерлері үшін құжаттар беретін жұмыс берушілер үшін:
- жалақысы сақталмайтын демалысқа жіберу туралы бұйрық;
- жұмыс берушінің ТЖ кезеңінде кірісін жоғалту фактісін растайтын құжаттар (банктік шоттардан үзінділерді қоса алғанда, қаржылық және өзге де есептілік, бухгалтерлік баланс және басқа құжаттар);
- мемлекеттік кірістер органдары қабылдаған декларация (Мемлекеттік кірістер комитетімен (МКК) салыстыру үшін, 200-нысан).
ЖК және жеке тәжірибемен айналысатын адамдар үшін:
- мемлекеттік кірістер органдары қабылдаған декларация (МКК-мен салыстыру үшін, 200-нысан);
- табысты жоғалту дерегін растайтын құжаттар (банктік шоттардан үзінділерді қоса алғанда, қаржылық және өзге де есептілік, бухгалтерлік баланс және басқа да құжаттар).
АҚС шарттар бойынша жұмыс істейтін адамдар үшін:
- заңды тұлғамен жасалған жұмыстарды орындауға (қызмет көрсетуге) арналған АҚС шарты.
Ұсынылған құжаттарды қарағаннан кейін аудандық (қалалық) штаб 42 500 теңге әлеуметтік төлемін тағайындауға құқығы бар/жоғы туралы қорытынды шығарады.
Аудандық (қалалық) штабтың қорытындысымен немесе МӘСҚ филиалының шешімімен келіспеген жағдайда, өтініш беруші растайтын құжаттармен аудандық (қалалық) штабтың жұмыс органы арқылы облыстық (қалалық) штабқа жүгінеді.
