Бүгін, 24 шілде, Стамбулдағы аты аңызға айналған, мұсылман әлемінің айшықты орындарының бірі Айя-София мешітінде сексен жылдан астам уақыттан бері бірінші жұма намазы оқылып жатыр деп хабарлайды QazPulse тілшісі.
Түркия Президенті Режеп Тайып Ердоған қатысудағы құлшылық күні бойы жалғасып, қасиетті Құран аяттары оқылуда.
Қазіргі ахуалға байланысты бұл жұма намазын тек 500 адам ғана оқи алаты айтылғанымен, мешіт маңайына көптеген адамдар жиналуда.
Осы орайда атап өтерлік жайт, таяуда Түркия басшысының шешімімен, тарихи нысан мұражайдан қайта мешітке айналды.
Христиандардың іргелі мекені болып келген Константинополь мұсылмандарға бағынған соң, Айя-София мешіт ретінде есігін айқара ашты. Содан кейін Мұстафа Ататүріктің зайырлылық ұйғарымымен мұражай болып жұмыс істеді. Енді, міне, қайта жаңғырып отыр.
Қазақстанда болса, Құрбан айт мерекесінің алғашқы күні – 31 шілде карантин мезгіліне сай келгендіктен, мерекелік намаз оқылмайды, құрбандықты qurban2020.kz сайты арқылы онлайн шалу ұсынылуда.
«Карантинге байланысты осы жылы арнайы сайт ашылды. Онда онлайн режимде құрбан шалу мүмкін болады. Бұл тәжірибе Түркия, Малайзия, БАӘ елдерінде бұрыннан қалыптасқан. Құрбандық еті толығымен мәжбүр отбасыларға таратылады», – деген бас мүфти Наурызбай қажы Тағанұлы қазіргі кезде ауырғандарға дәрі-дәрмек, азық-түлік жеткізген, көпбалалы отбасыларға, қарттарға көмектескендердің сауабы мол екенін нұсқады.
Сонымен қатар, Қазақстан мұсылмандары діни басқармасының төрағасы Сәтбаев қаласы мен Түркістан облысындағы жағдайға барынша сабырлы болуды, ахуалды ушықтырып алмауға шақырды.
