Алматы қаласының полиция департаменті армениялық көліктерді қалай дұрыс тіркеуге болатыны жайлы кеңес беруге дайын деп хабарлайды QazPulse тілшісі.
Жедел желі орталығына таңғы сағат 9.00-ден кешкі 19.00-ге дейін, 8-747-080-01-56 немесе 298-50-71 нөмірлері арқылы қоңырау шалуға болады.
Осы орайда Алматы полиция департаменті басшысының бірінші орынбасары Нұрлан Алмасбеков, Үкімет қаулысына сәйкес, тіркеуге Армениядан елге 2020 жылдың 1 ақпанына дейін кіргізілген және рөлі сол жағында орналасқан көліктер жататынын айтады. Тіркеудің өзі биылғы 1 маусым мен 1 қыркүйек аралығы жүргізілмек.
Тағы бір маңызды жайт, тіркеу алымы мен техникалық төлқұжатқа және мемлекеттік нөмірге барлығы 11 мың 946 теңге ғана кетпек.
Нәтижесінде «уақытша» тіркелген көлікті толыққанды рәсімдегенше (кедендік және кәдеге жарату төлемімен) немесе Қазақстан аумағынан шығарғанша, болмаса әбден тозғанша 18-ші аймақтың сары нөмірімен тебе бересіз. Сата алмайсыз.
Ескертерлігі, Армения Республикасының құзырлы органы беретін тіркеу құжатында көлік иесі ретінде көрсетілмеген тұлғаларға және 2020 жылдың 1 ақпанынан соң әкелінген көліктер тіркелмейді.
Қажет құжаттардың тізімі мен арнайы Халыққа қызмет көрсету орталықтарының мекенжайы zakon.kz материалында көрсетілген.
