Арыс қаласының тұрғыны телеграмда арнайы топ ашып, ішінде жасөспірімдерге суицидті насихаттаған, деп хабарлайды QazPulse Ішкі істер министрлігінің баспасөз қызметіне сілтеме жасап.
Кәмелетке толмаған қазақстандықтарға өз-өзіне қол жұмсауға итермелейтін топтың барын ІІМ Криминалдық полиция және тергеу қызметкерлері Интернет желісіне мониторинг жүргізу кезінде анықтады.
Тәртіп сақшылары бірден бұған қатысы бар адамдарды іздестіруге көшкен. Киберқылмысқа қарсы іс-қимыл орталығының және Түркістан облысы полиция департаментінің қызметкерлерінен арнайы жедел-тергеу тобы құрылды. Басты мәселе – балалардың өмірі сақтап қалу еді.
Тексеріс барысында полиция телеграмдағы топтың ұйымдастырушысының ізіне түсіп, оның жеке-бас деректері мен мекен-жайын анықтады.
Суицидке қатысты арнаның «кураторы» Арыс қаласының тұрғыны болып шықты. Тінту кезінде күдіктіден ноутбук, ұялы телефон, үш қорап сим-карта және басқа да заттай дәлелдемелер алынды. Телефоннан суицидке бағытталған телеграм арналары табылды.
Қазіргі уақытта аталған жайт адам өлтіруге оқталу бойынша тіркеліп, сотқа дейінгі тергеу амалдары жүргізіліп жатыр. Сот санкциясымен күдікті қамауға алынды.
«Полиция қызметкерлері істің толық мән-жайын тексеріп жатыр. Сондай-ақ жасөспірімдерді осындай өлімге әкелетін ойындарға қатыстыруы мүмкін адамдарды және арна қатысушыларының өздерін де анықтаймыз», – деп мәлімдеді ІІМ Криминалдық полиция департаментінің бастығы Думан Таев.
Арыстық жігіттің суицид жайлы топты не себепті ашқаны әрі қарайғы тергеу кезінде белгілі болады.
