Осыдан екі күн бұрын Атырауда ересектер Әли есімді баладан көз жазып қалған болатын. Енді, міне, өкінішке қарай сәбидің мүрдесі өзі тұрып жатқан үйдің кәрізінен табылды деп хабарлайды QazPulse тілшісі.
«Кеше шамамен түскі сағат 13.30 кезінде Жұлдыз ықшам ауданы 10 көшедегі №57 үйден Әли есімді бір жарым жастағы бала шығып кеткен. Содан бері хабар жоқ. Тиісті органдар мен еріктілер, азаматтар іздестіріп жатыр. Көрген-білгендер болса, 102 нөміріне хабарлассаңыздар. Балапанымыздың тез табылып, аман-есен ата-анасымен қауышуын тілеймін!» деп жазған болатын Атырау облысының әкімі Махамбет Досмұхамбетов.
«Ақжайық» сайтының жазуынша, баланың денесі өз үйінің ауласындағы септиктен табылды. Аулада біреуі бос тұрған, екіншісі пайдаланып отырған екі құдық бар. Баланың денесі сол пайдаланып отырған шұңқырдың ішінен шыққан.
