Қазіргі мың құбылған заманда цифрландырудың аса өзектілігін түсінген сияқты болған елімізде бұл салаға қыруар қаржы құйылып, бірқатар батыл жобалар қолға алынғандай еді… Бірақ… қауіпті індеттің алдын алу мақсатында ірі қалаларда халық жаппай оқшауланып, ғаламтордағы мемлекеттік қызметке сұраныс күрт артып еді, іс жүзінде олқылықтың көптігі байқалып қалды.
Ауылға әлі сапалы интернеттің жетпегені белгілі ғой, бірақ өркениет ортасы деген бас шаһарлардың өзінде алғашында онлайн жүргізіледі деген оқудың өзі неғұрлым қарапайым қашықтық дегенге көшіп, білім министрі Асхат Аймағамбетов бұл тұста қауқарсыздығын мойындады. Ауылдағы жастардың интернетке қосылу үшін иен даладағы төбеге көтерілуге мәжбүр болатынын қайтеміз. Ел Төтенше жағдай кезінде беріліп жатқан 42 500 теңге әлеуметтік төлемге әлі жете алмай әлек. Телекоммуникация бағытындағы ұлттық компания «Қазақтелеком» Мәдениет министрлігімен тізе қосқан райда «Карантиндегі жұлдыз» жобасында өнер адамдарына ән шырқатып қойғанымен, қарны ашқан қалың бұқара азын-аулақ болсын көмек қаржыға жүрек жалғағысы келеді ғой. Тіпті шыдамай көшеге шығып кеткенін несіне жасырамыз. Ішкі істер министрлігі құрған карантин аумағында көлікпен жүріп-тұруға рұқсат беретін сайт бір көлікке байланысты саналуан дерекпен таңғалдырып қызық болса, елордада мұндай сайттың ресейлік блогердің поштасына жөн сілтегені қайран қалдырды.
Құзырлы министр Асқар Жұмағалиев еговтың құлап түсуінің аса зор жүктемемен түсіндіргендей болды. Рас, бұл басшыға дейін де жақсы бағдарламалардың қабылданғанын әділдікпен айғақтау керек. Мысалы осы электрондық үкіметтің арқасында кезінде «РНН» алу үшін ауданға сабылып, сірескен шенеуніктің аузына қарайтын жұрт айналдырған бес-он жылдың әр жақ, бер жағы бір тетікті басып небір құжаттарды иемденетін жағдайда еңсесі көтерілді. Сондай-ақ салыстыра қарағанда қазақстандық ғаламтор байланысының ақырындап болсын арзандап, қолжетімділігі артып келетінін ұмытпаған абзал.
Алайда Мемлекет басшысы Қасым-Жомарт Тоқаев ТЖ тәртібін қамтамасыз ету жөніндегі мемлкеттік комиссия отырысында күйрей құлап түскен отандық интернеттің әлсіздігін ашық көрсетіп, қалыптасқан ахуалды сынға алды. Айтпақшы Еңбек және халықты әлеуметтік қорғау министрі де Біржан Нұрымбетов кеше ғана өз тарапынан кешірім де сұрады.
Енді міне бүгін ҚР Президенті жанындағы Орталық коммуникация қызметінде өткен баспасөз мәслихатында цифрлық даму, инновация және аэроғарыш өнеркәсібі вице-министрі Дарын Тұяқов қазіргі сәтте интернет желісінің ең қажет құрал болып отырғанын айтып, әр қазақстандықтың жоғары жылдамдықтағы интернетке сұранысын өтеу басты назарда екеніне сендірді.
«Байланыс операторларымен бірлесе бірқатар жобалар атқарылуда. 1250 ауылды интернет желісіне қосу жүргізілуде. Осы жылғы үш айдың ішінде жалпы қызмет көрсету көлемінде интернетті кәдеге жарату 36,3%-ды құрап, өткен жылдың сәйкес мерзімімен салыстырғанда 13,5%-ға ұлғайды. Бұған ел аумағында ТЖ жарияланып, көптеген өңірлерде карантин тәртібінің енгізілуі себеп болғаны аян», – деген вице-министр шағын елдімекендерді сапалы ғаламтормен қамту ақсауда екенін растап, қазіргі таңда 607 ауыл талшықты-оптикалық байланыс желісіне қосылғанын, қалғаны жылдың аяғына дейін қосылып болатынын уәде етті.
Министрдің орынбасары тұрғындары 250 адамнан асаты 928 ауылдық елдімекен интернет байланысының «3G» және «4G» деңгейіне қол жеткізетінін мәлімдеді. Ал қаладағылар «5G» болып қала ма деп армандап жүр…
