Бас прокурор Ғизат Нұрдәулетов ағайынды Бергей және Аманжан Рысқалиевтердің және өзге де кейбір олардың жақтастарының үкімін қайта қарастырған жөн деп отыр. Тиісті кассациялық қарсылық Қазақстан Республикасының Жоғарғы сотына жолданған деп хабарлайды QazPulse тілшісі.
26 беттен тұратын қарсылықта Бас прокурор былтыр, яғни 2019 жылы сотталғандардың және жақындарының, оның ішінде әйелдерінің дүние-мүлкі өздеріне қайтарылып берілуі керек деп санайды. Мәселен, құжатқа Нұр-Сұлтан, Атырау, Ақтөбе қалаларындағы жер телімдері, Атыраудағы үй, құрылыс, мұнай салаларындағы көптеген компаниялардағы үлес, дүкен, тұрғын емес жайлар арқау болған. Сонымен қатар, Қазақстан мұсылмандары діни басқармасына Бергей Рысқалиевтің әкесінің атынан тарту етілген мешітті де тәркілеуді заңсыз деп табу ұсынылуда.
Жоғарғы сот Бас прокуратураның наразылығын осы жылғы 23 маусым күні қарамақ.
Еске сала кетсек, 2006-2012 жылдары Атырау облысының әкімі болған Бергей Рысқалиев 17 жылға сотталды. Сол кезде, сот үкімі бойынша, 50 пәтер мен 44 жер телімі және 185 түрлі нысан, банк шоттарындағы қаржы тәркіленді. Бүгінде, сырттай сотталушы, БАҚ бетінде көрініп қалғандай, Лондонда жүр.
