Карантиннің қайта күшіне енуіне байланысты шілде айына тағайындалатын 42 500 теңге біржолғы әлеуметтік көмекке өтініш қабылдайтын порталдар осы жұма, 17 шілде күні ашылады. Қазір дайындық жұмыстары жүргізіліп, тиісті ереже түзілуде.
Бұл туралы, бүгін, баспасөз мәслихатында еңбек және халықты әлеуметтік қорғау министрі Біржан Нұрымбетов айтты деп хабарлайды QazPulse тілшісі.
Өтініш беру талабының сақталып отырған себебі, ТЖ кезінде табыссыз қалғандардың қазір жұмысы жандануы немесе керісінше шаруасын дөңгелетіп келіп, дәл қазір көмекке мұқтаж болып қалуы ықтимал. Дегенмен, кейбір азаматтардың расымен бұрынғыдай төлемге зәрулігі анықталса, СМС-хабарламамен жағдайы нақтыланып, өтінішсіз тағайындау жағы сарапқа салынбақ.
«Біз жұма күні азаматтардың өтініш беруге мүмкіндігі пайда болады деп үміттенеміз, ал дүйсенбіден бастап төлемдерді тағайындауға кірісуді жоспарлап отырмыз. Сондай-ақ біз жекелеген санаттағы азаматтар үшін проактивті форматта төлем тағайындау мүмкіндігін қарастырамыз», – деді Біржан Нұрымбетов.
Өтініштерді бұрынғыдай 42500.enbek.kz cайты және egov.kz арқылы қабылдау көзделуде. Сондай-ақ телеграм-боттар да сол қалпы жұмыс істемек. Министрдің мәлімдеуінше, «Каспий банк» пен «Халық банк» те өтінім жинауға кірісуі мүмкін.
Төлем карантин тұсында қызметі тоқыраған жұмыс берушілер мен жеке кәсіпкерлердің және өзін жұмыспен қамтушылардың өтінімі негізінде беріледі.
«Жұмысы тоқтап қалған кәсіпорын басшылары ақысыз демалысқа жіберген қызметкерлері үшін арнайы порталда өтініш береді. Оны жергілікті құзырлы орындар тексеріп отырады. Сондықтан жұмыс берушілер қазірден жұмысшыларының мәліметтерін тексеріп, құжаттарын дайындай берсе», – деді Біржан Нұрымбетов.
Жеке кәсіпкерлердің шаруасының тоқырағаны туралы «Атамекен» ұлттық кәсіпкерлер палатасының өңірлік бөлімшелері мен мемлекеттік кіріс мекемесі растауы тиіс.
Өзін жұмыспен қамтушыларға Бірыңғай жиынтық төлемді (БЖТ) қайта төлеу міндеттелмейді, олар да кәсіпкерлер сияқты өтінішті өздері береді. БЖТ барын, өтінім берушінің басқа да жәрдемақы алып жату ықтималдығын құзырлы орын өзі тексеріп алады.
Шектеу шараларының нәтижесінде табысын жоғалтқан азаматтарға біржолғы төлем тағайындау 20 шілдеде басталады деп жоспарлануда.
Сонымен қатар, Төтенше жағдай тәртібіндегідей халықтың жекелеген санаттарына, яғни миллионнан астам адамға азық-түлік алу үшін ақшалай жәрдем беру жалғасады.
Ал атаулы әлеуметтік көмек пен мүгедектік мерзімі ағымдағы жылдың 3-тоқсанына автоматты түрде ұзартылмақ.
Жалпы карантинге дейін жұмысынан айырылғандарға бөлек жәрдемақы қамтамасыз етілген. Ол үшін жұмыспен қамту орталығына жүгінген абзал. Студенттер мен бала күтімімен отырғандар бөлек санат ретінде қарастырылмайды.
Министр ең төменгі жалақы мөлшері болып есептелетін 42 500 теңгенің қазіргі өмір сүру деңгейінде аз екеніне келісіп, бұл соманы көбейтуді ұдайы мәселе ретінде көтеруде екенін жеткізді.
Алдаберген КЕМПІРБАЙ
