Коронавирус қаупіне байланысты биылғы 28 шілде-2 тамыз аралығына жоспарланған парыз қажылық шетелден келетін мұсылмандардың қатысуынсыз өтеді және қасиетті аймаққа жіберілгендер саны ең көбі он мың адаммен шектеледі. Әдетте бұл көрсеткіш 2 миллионға жетеді деп хабарлайды QazPulse тілшісі ақпарат көздеріне сүйеніп.
Сонымен, басты шектеулерге келсек, қажылық кезінде Қағбаға қол тигізіп, оны сүюге болмайды. Ол үшін Қағбаның маңайына кедергілер орнатылады.
Әр рәсімге 50-ден аспайтын шағын топ қана қатысып, олар медициналық маскалар киіп, қашықтықты ұстауы тиіс.
Шатырлар кемінде 1,5 метр қашықтықта тігіліп, зәмзәм суын тек бір рет қолданылатын ыдыспен ішуге рұқсат етілмек.
Қос қасиетті қала Мекке мен Мәдина орналасқан Сауд Арабиясы елі коронавирус індетін жұқтырғандар саны бойынша араб елдерінің арасында әлі де бірінші орында, бүгінде аурулар қатары пандемия басталғаннан бері 217 мыңнан асты. 154 мыңнан астам адам сауықса, 2017-і қайтыс болды.
