Бүгін Қырғызстанның астанасы Бішкек қаласында елдің экс-үкімет басшысы Сапар Исаков «Тарих мұражайын жөндеу кезінде және Шолпан-атадағы ипподром құрылысы кезінде ақша жымқыруға қатысы бар» деген айыппен 18 жылға сотталды деп хабарлайды QazPulse тілшісі. Бұған дейін, сот, оған 15 жыл жаза кескен еді.
«Осыған дейін шыққан сот үкіміндегі жазамен жартылай біріктіріп, Исаковқа 18 жыл бас бостандығынан айыру тағайындалсын. Жазаны өтеу 2018 жылдың 5 маусымынан есептелсін», – деді судья Марат Сыдыков.
Сот Исаковқа 247 млн 650 мың сом (шамамен 3,35 млн доллар) айыппұл салды.
Сот осы іс бойынша екінші айыпталушы – президент әкімшілігінің азаматтық даму, дін және этникалық саясат бөлімінің жетекшісі Мира Карыбаеваға 247 млн сом (3,3 млн доллар) айыппұл салды.
2019 жылы желтоқсанда Сапар Исаков Бішкектегі жылу электр орталығының жөндеу ісінде жемқорлық айыбымен 15 жылға сотталды. Исаковтың дүние-мүлкі тәркіленіп, дипломынан, екінші дәрежелі «Манас» орденінен айырған. Үш жыл мемлекеттік қызмет атқаруға тыйым салды.
Сапар Исаков 2017-18 жылдары, Алмазбек Атамбаевтың тұсында, елдің премьері болды. Қазір өзі де істі болып жатқан Алмазбек Атамбаевтың жақын серіктестерінің бірі саналады.
Кейін, билік ауысқан соң, президенттікке Сооронбай Жээнбеков келіп, Атамбаевтың бірнеше серіктесіне жемқорлық айыбымен іс қозғалды. Тергеу актісіне сай, Исаков Бішкек жылу орталығын жөндеу кезінде қытайлық «ТВЕА» компаниясымен жең ұшынан жалғасқан.
