Жедел жәрдем көлігінің зор тапшылығы сезіліп, отандық өндірістен 807 жаңа медициналық машина алу жайлы келісім жасалған деп хабарлайды QazPulse тілшісі.
Сонымен қатар, шетелдік тәжірибеде қалыптасқандай, corona-taxi қызметін ұйымдастыру жағы қарастырылып жатыр.
«Тиісті ұсыныстар ведомствоаралық комиссия назарына жеткізілді және қолдау табады деген үміттемін», – деді денсаулық сақтау министрі Алексей Цой бүгінгі баспасөз мәслихаты барысында.
Осы орайда желі қолданушылары бұған дейін ақылы тест тапсыруға жүгіртіп еді, енді жекеменшік такси парктерін қазынадан қаржыландыру қолға алына ма деген күдігін жазуда.
Сонымен қатар, министр, компьютерлік томографияға (КТ) үлкен кезектер пайда болғандықтан, өкпенің қабынуын (пневмония) сандық рентген аппараттарында анықтауды кеңес етті.
Халықты тестілеумен қамту үшін науқастарды үйде емдеу мен сынама алу мақсатында 3 мың жедел топ ұйымдастырылмақ.
«Өкінішке орай, әрбір отбасы осы вируспен бетпе-бет келді деп айтуға болады. COVID-19 инфекциясының таралуы күн сайын артып келеді. 30 маусымдағы есеп бойынша елімізде 40 мыңдай адам вирус жұқтырған және адам өлімі орын алуда», – деп мойындады министр.
Сала басшысы бұқара тарапынан өткір сұраныс туындаған дәрілердің жеткілікті қоры барына, оларды өңірлерге жеткізу жолға қойылғанына сендірді. Әсіресе дене қызуын басатын дәрілерге ерекше көңіл бөлініп, «Ингавирин» (70 мың дана) және «Терафлю» (49 мың дана) препараттары аптаның аяғына дейін қоймаларға, сосын әрі қарай аймақтарға табысталмақ. Министр бұл дәрілердің COVID-19 сырқатын хаттама бойынша амбулаторлық деңгейде емдеуге қолданылмайтынын ескертті.
Айтпақшы министрлікке қарасты ұлттық сараптау орталығы дәрі бағасының қымбаттап кеткеніне DariKZ ұялы телефон қосымшасында шағымдануға болатынын мәлімдеді. Онда дәрі рецепт арқылы беріле ме, басқа түрі бар ма дегендей сауалдарға жауап алуға болады.
Алдаберген КЕМПІРБАЙ
