Бұған дейін әлеуметтік желіде Қалибек Қуанышбаев атындағы қазақ мемлекеттік академиялық музыкалық драма театрының көркемдік жетекшісі, Қазақстанның Халық әртісі Талғат Теменовтің ҚР ақпарат және қоғамдық даму министрі Аида Балаеваға жазған ашық хаты тараған еді. Онда белгілі театр және кино режиссері отандық телевизия саласының мазмұндық әрі көркемдің деңгейі құлдырап кеткеніне алаңдаушылық танытып, басқа да салаға қатысты өзін толғандырған мәселелерді қозғайды.
Ашық хатқа осы уақытқа дейін төрт жылдан астам аталған министрлікті басқарған, бүгінде ҚР Президенті Әкімшілігі басшысының бірінші орынбасары болып тағайындалған Дәурен Абаев жауап берді деп хабарлайды QazPulse тілшісі.
Онда, ағаның базынасына інілік ойын ортаға салған бұрынғы ақпарат министрі қазақ тілінде ақпарат таратып, төл туынды ұсынатын отандық телеарналардың Тәуелсіздік жылдары көбейгенін, кемшіліктермен бірге даму сатыларының да көп болғанын келтіреді.
«…Рейтинг мәселесіне байланысты қоғамда екіұдай пікір бар екенін білемін. Бірақ, қазір көрерменнің қолында пульт бар. Бағдарлама, фильм немесе жаңалық тартымды болмаса, әп-сәтте басқа арнаға ауыстыра салады. Кино ма, сериал ма, спорт па, мультфильм бе – көрермен нені қалайды, соны көреді. Барлығы көрерменнің талғамы мен қызығушылығына байланысты. Әзіл-сықақ, музыка, тағы да басқа хабарлардың да өз аудиториясы бар», – деген Дәурен Абаев барлығы шын бәсекеде анықталады, ауылға сапалы байланыс жеткенде көпшілікке ұнайтын бағдарламалар қалады деп отыр.
Оның сөзінше, 2022 жылы цифрлық телевидениеге көшу аяқталып, нәтижесінде шалғай ауылдардағы ағайын қазіргідей 2-3 емес, ең кемінде 15 телеарна көретін болмақ. Ал қазіргі «Қалаулым» сынды бағдарламалар тұрғысында көрерменнің талғамы әртүрлі екені уәжделді. Сұранысқа дер кезінде ұсыныс жасалмаса, ақпараттық кеңістікті өзге елдердің шығармалары толтырмақ. Киносериалдар бойынша да қазақстандық туындылар көрерменге жол тартатынына сендірді лауазым иесі.
«…Ұлттық код туралы алаңдауыңыз өте орынды. Ұлттық код өз алдына жеке-дара өмір сүрмейтіні де белгілі. Ол тілімізде, өнерімізде, салтымыз бен дәстүрімізде. Сонымен бірге, Өзіңіз секілді ұлттық масштабтағы дүниелер жасап жүрген Тұлғалардың бойында», – деп қайырды Дәурен Абаев.
Ағаға базынанемесе төл телевидениеміз туралы өзгеше ой Қазақстанның халық әртісіТ. Теменовке Құрметті, Талғат…
Опубликовано Дауреном Абаевым Суббота, 30 мая 2020 г.
