Бұл жолы да Алматы қалалық полиция департаментінің басшысы Қанат Таймерденов екі полицейдің өліміне күдікті Азат Азаматовтың жұмыстан қашан шығарылғанын нақты айтпады, деп хабарлайды QazPulse тілшісі Sputnik cайтына сілтеме жасап.
25 мамыр блокбекетте болған апат бойынша қазір, қылмыстық істі, Алматы облысының полиция департаментінің қызметкерлері тергеуде. Себебі жол апаты солар жауапты аумақта орын алған.
Еске сала кетсек, жол-көлік оқиғасында екі полицей қаза тауып, апатқа себепші болған Азат Азаматов осы айдың басында ғана лейтенант шенін алған полиция қызметкері екені анықталды. Әуелі Алматы қалалық полиция департаменті күдіктінің ішкі істер қызметіне қатысты екенін жоққа шығарса, кейінірек олардың жалған ақпарат таратқаны белгілі болды.
Қазақстандықтар желіде жалған мәлімет таратқаны үшін Қанат Таймерденов пен полиция департаментінің баспасөз хатшысы Салтанат Әзірбектің отставкаға кетуін талап етті. Алайда оларға жаза ішкі істер министрі Ерлан Тұрғымбаевтың қатаң сөгісімен ғана шектелді.
Сұхбат барысында Таймерденов Азаматовтың апат кезінде полиция қызметкері болғандығын немесе оған дейін жұмыстан шығарылғанын атап айтқан жоқ, тіпті теріс ақпарат таратқаны үшін кешірім де сұрамады. Оның сөзінше, бұл мәлімет енді маңызды емес.
«Болған жайт бойынша көп айтылды да, жазылып та қойды. Иә, біздің жақында ғана жұмыстан шығарылған бұрынғы қызметкеріміз (күдікті Азат Азаматов –ред.) жол апатына себепші болды. (…) Оқиға орын алған кезде оның жұмыстан шығарылғаны немесе полицияда қызмет істеп жүргені қазір маңызды емес. Ол рөлге мас күйінде саналы түрде отырды, қандай салдары болуы мүмкін екенін білді. Қылмысқа барды және сол үшін жауап береді. Қатаң жазаланады. Бастысы осы. Сондықтан дәлелсіз болжамдар жасамай, өсек таратпай, ресми тергеудің нәтижелерін күтуге шақырамын», – дейді полиция басшысы.
Бұдан бөлек, полиция басшысы Алматыдағы креминогендік жағдай туралы, оның ішінде ұйымдасқан қылмыстық топ жайлы мәлімдеді.
Полиция басшысының сөзінше, қазір ұйымдасқан қылмыстық топтың сипаты өзгерген. Егер 90-жылдары ҰҚТ деп бандиттер мен рэкетирлерді атаса, ендігі ұйымдасқан қылмыстық топ туралы істер көбіне алаяқтық, есірткі саудалау деректерін тергеу кезінде қарастырылады.
«Жақында ғана біз синтетикалық есірткіні дайындау және таратумен айналысатын қылмыстық топты анықтадық. Бәрін ұстадық. Қазіргі жағдай «Төрт ағайынды» немесе «Сары Алмас» кезіндегідей деп айта алмаймын… ондай қазір мүлдем жоқ десе болады. Бүгінде ҰҚТ мүшелері ақылдырақ. Сондықтан біз де көштен кеш қалмауымыз керек. Оған қажет ресурс бізде бар», – дейді Таймерденов.
Алаяқтықпен күрес тұрғысында, соңғы жылдары қаржылық пирамидалардың саны көбейгендіктен, күрделі экономикалық істерді тергейтін арнайы бөлімше жасақталған.
