Қазақстанда карантин тағы екі аптаға, 20 шілдеден 2 тамызға дейін ұзартылады деп хабарлайды QazPulse тілшісі.
Үкімет басшысы Асқар Маминның айтуынша, эпидемиологиялық ахуалды тұрақтандыру мақсатында, денсаулық сақтау министрлігі осындай ұсыныс жасаған.
Шілдедегі шектеу шаралары аясында, Мемлекет басшысы мұқтаж жандарға бір айға 42 500 теңге әлеуметтік төлем жасауды тапсырғаны белгілі. Төлем карантин кезінде қызметі тоқтаған жұмыс берушілер мен жеке кәсіпкерлердің және өзін жұмыспен қамтушылардың өтінімі негізінде жүзеге асырылмақ.
«Мемлекет басшысының тапсырмасына сай, біз, шектеу шаралары кезінде ең төменгі жалақы мөлшерінде, бір айға 42 500 теңге әлеуметтік төлем жасауды ұйғардық. Төлем карантин тұсында қызметі тоқыраған жұмыс берушілер мен жеке кәсіпкерлердің және өзін жұмыспен қамтушылардың өтінімі негізінде беріледі», – деді Асқар Мамин бүгінгі Үкімет отырысында.
Сонымен қатар, Еңбек және халықты әлеуметтік қорғау министрлігіне, Төтенше жағдай тәртібіндегідей халықтың жекелеген санаттарына азық-түлік алу үшін ақшалай жәрдемді жүргізуді жалғастыруды жүктеді. Бұл – миллионнан астам адам.
Ал атаулы әлеуметтік көмек пен мүгедектік ағымдағы жылдың 3-тоқсанына автоматты түрде ұзартылмақ.
