ҚР Президенті Қасым-Жомарт Тоқаев, Мемлекеттік комиссияға, екі күн ішінде осы жылдың наурыз-мамыр айларындағыдай қатаң карантин енгізу туралы ұсынысты әзірлеуді тапсырды деп хабарлайды QazPulse тілшісі.
Мемлекет басшысы бұл қадамның мәнісін ағымдағы эпидемиологиялық жағдайды тұрақтандыру бойынша шұғыл шараларды қабылдау қажеттілігімен түсіндірді.
«Шілде айының аяғына дейін жұқпалы ауруларға арналған орын санын 50%-ға көбейтуді тапсырамын… Бұл үшін аймақтар барлық резервті, соның ішінде жеке және ведомстволық медицинаны толық қолдануы керек. Үкіметке дәрі-дәрмекпен қамтамасыз ету мәселесін бес күннің ішінде шешуді тапсырамын», – деді Қасым-Жомарт Тоқаев коронавирустық инфекцияның таралуына қарсы іс-қимыл жөніндегі кеңесте.
Шұғыл шаралармен қатар ұзаққа созылатын коронавирус пандемиясына дайындық қолға алынбақ. Бұл ретте қазақстандықтардың өмірі мен денсаулығын қорғауда Ұлттық жоспар түзіледі.
Дегенмен, Президент, қазақстандықтарды үрейге бой алдырмауға шақырды.
«Иә, бұл қауіпті ауру, оны емдейтін вакцина жоқ. Бірақ бұл жағдайда үрейге, заңға қайшы әрекеттерге, дәрігерлерді балағаттауға бой алдырмаған және де санитарлық режимді бұзбаған жөн. Науқастар күйзеліске түспеуі керек. Емделумен қатар, адамның жақсы физикалық және рухани жағдайы оның тез жазылуына ықпал етеді», – деді ол.
