Қазақстан ғалымдары әзірлеп жатқан коронавирусқа қарсы вакцина клиникалық зерттеуден күзде өткізіледі деп хабарлайды QazPulse тілшісі.
Қазір үш платформада бес кандидаттық вакцина әзірленуде. Біріншісі инактивацияланған вакцина, екіншісі – рекомбинантты суббірлікті вакцина, үшіншісі – рекомбинантты векторлық вакцина.
15 мамырда кандидаттық инактивацияланған вакцинаның клиникаға дейінгі сынағы басталды. Ол тышқандарға егіліп, қауіпсіздігі және иммуногендігі тексерілді.
Білім және ғылым министрі Асхат Аймағамбетов айтуынша, 10-23 маусым аралығында кандидаттық вакцинаның уыттылығы мен аллергиялық қасиеттері, әрі қарай екпенің жалпы иммуногендігі зерттеледі.
«Қыркүйек айында клиникалық зерттеулерді бастау жоспарланып отыр», – деді министр Үкімет отырысында.
Жалпы бес айдың ішінде республикада 1 411 647 адамға жұқпалы ауруларға қарсы профилактикалық екпе жасалды, бұл егілуге тиіс адамдардың 92 пайызын құрайды. Негізі халықтың 95 пайызы егілуі керек.
«Вакцинациялаумен жеткіліксіз қамту төтенше жағдай кезінде жоспарлы профилактикалық егулер жүргізудің тоқтатылуына байланысты болды. Қазіргі уақытта жоспарлы вакцинация қайта басталды, оның ішінде төтенше жағдай кезінде екпе алмаған балалар егілуде», – деп мәлімдеді денсаулық сақтау министрінің міндетін атқарушы Ләззат Ақтаева.
Дей тұрғанмен, профилактикалық егулерден бас тартқандардың саны алдыңғы жылдың сәйкес кезеңімен салыстырғанда 13 пайызға өскені байқалады. 2020 жылдың 1 тоқсанында 1 423 бас тарту есепке алынған.
Қызығы, вакцинациядан бас тартқан адамдар арасында артынан егілуге келіскендер де болыпты.
«Бас тарту себептері бойынша ең үлкен үлес салмақ жеке сенім бойынша бас тартуға келеді және ол жалпы бас тарту санының 52,9 пайызын құрайды, діни пайымдаулар бойынша – 29, вакцинаға сенімсіздік – 11, БАҚ-тағы теріс ақпарат бойынша – 6 пайыз. Бас тартқандар арасында 309 адам егілді», – деді Ақтаева.
Биыл жұқпалы аурулардың 57 түрі бойынша науқастану төмендеді, оның ішінде менингит – 3,5 есе, қызылша – 2,8 есе, сальмонеллез – 2,1 есе азайды.
