15 маусым Мәскеуде болған атыс салдарынан үш адам жарақаттанып, дереу ауруханаға жеткізілді, деп хабарлайды QazPulse тілшісі.
Қақтығыс Мәскеудің Ленин даңғылында «Салют» мейрамханасының жанында орын алған.
— Алексей Кириленко (@Kirilenko_a) June 15, 2020
Жол-патрульдік қызметі жол ережесін бұзған таксистті тоқтатып тұрған кезде, көшеде өтіп бара жатқан адам полицейлерге оқ атқан көрінеді.
«Өтіп бара жатқан азамат алдын ала мәлімет бойынша жарақат салатын тапаншадан ЖПҚ қызметкерлеріне оқ атып, екі полицейді жаралады», – деп хабарлады ішкі істер басқармасынан.
Алайда, бірқатар Ресей басылымдары полиция қызметкерлеріне тапанша кезенген таксист немесе оның жолаушысы деп жазды.
Жарақаттарына қарамастан, полицейлер де күдіктіге оқ атып, оны ұстаған. Нәтижесінде оқиғаның барлық қатысушылары ауруханаға жатқызылды.
Полицейлер өміріне қастандық қылу дерегі бойынша қылмыстық іс қозғалып отыр. Күдікті – Ингушетиядан келген 25-жасар Ратмир Галаев.
Ол әлеуметтік желілерде экстремистік бағытта ақпарат таратқан және «өзі ренжіткен адамдардан кешірім сұрап, өмірінің кез-келген сәтте үзілуі мүмкін екенін» жазған көрінеді. Алайда Галаев радикалды көз-қарасы үшін ішкі істер органдарында есепте тұрмаған болып шықты.
«Интерфакс» агенттігінің ақпараты бойынша, қазір ішкі істер органдары күдіктінің басқа ауыр қылмыстарға қатысы бар-жоғын тексеруде. Атап айтқанда, Галаев Ингушетиядағы экстремизмге қарсы орталықтың бұрынғы басшысы Ибрагим Эльджаркиевтің өліміне қатысы болуы мүмкін.
Ал EDaily сайтының дерегінше, Ратмир Галаев үлгілі отбасында тәрбиеленген. Ол – Ингушетияның бұрынғы мүлік және жер мәселелері министрі Аюп Галаевтың жиені. Әкесі Азат Галаев ішкі істер органдарында қызмет атқарған, ұйымдасқан қылмыстық топ және есірткі саудасымен күрескен.
