1-16 маусым аралығында жергілікті білім саласындағы сапаны қамтамасыз ету департаменттері тиісті мониторинг жүргізген деп хабарлайды QazPulse тілшісі. Олардың мәліметтері бойынша, еңбек демалысына шыққан педагогтердің 93%-ы демалыс ақысын уақытылы алса, қалған 7%-ына уақытылы төленбегені анықталған.
Осы орайда білім және ғылым министрінің мұғалімдерге жалақы мен демалыс ақысының уақытылы төленуін тексеріп, қысқа мерзім ішінде тиісті шаралар қолдануды, яғни еңбек инспекцияларымен жұмыс істеуді тапсырғаны белгілі болып отыр.
Жұмыс берушілер мұғалімдерге еңбек демалысының төлемін кешіктіргені немесе төлемегені үшін заңға сәйкес жазаланбақ.
«Министрлік мұғалімдердің шағымдарын қарастырып, демалыс ақысын төлеу бойынша жағдайды бақылауда ұстап отыр. Бюджетте жалақыға да, еңбек демалысы ақысына да қаражат қарастырылған. Яғни ақша бар, бірақ кейбір аймақтарда төлемнің уақытылы жасалмағаны анықталды», – дейді министрліктің баспасөз хатшысы Гаухар Омарбек.
Заңға сәйкес мектептер мен балабақшалардағы педагогтерге жалақы төлеу тікелей ауданның немесе қаланың бюджетінен жүзеге асырылатынын айта кеткен жөн. Бюджеттік жоспарлау және төлемдерді ұйымдастыру – қалалар мен аудандар әкімдіктерінің құзыретінде.
Қазақстан Республикасының «Педагог мәртебесі туралы» Заңының 12-бабы 1-тармағының 3) және 4) тармақшаларында айқындалған әлеуметтік кепілдіктерге педагогке 56 күнтізбелік күнге төленетін жыл сайынғы ақылы еңбек демалысы, сондай-ақ күнтізбелік жылда еңбек демалысы кезінде кемінде бір лауазымдық жалақы мөлшерінде денсаулығын жақсартуға берілетін жәрдемақы кіреді.
