Бүгін, 29 мамырда сағат 17:50-де Ақжол көшесінде №41 бағдарындағы автобус пен «КамАЗ» автокөлігі соқтығысты деп хабарлайды QazPulse тілшісі.
Елордадағы жолаушылар тасымалына жауапты «CTS» компаниясының қоғаммен байланыс қызметінің басшысы Оксана Лоскутованың жазуынша, автобуста барлығы 50 адам болған.
Оқиғаның қалай өрбігеніне келсекғ «КамАЗ» жүк көлігінің жүргізушісі қарсы бетке шығып кетіп, автобуспен соқтығысқан.
«ЖКО салдарынан 13 адам зардап шекті. Жүргізуші жарақат алған жоқ. Автобустың сол жағы зақымдалды», делінген компания хабарламасында.
Компания өкілдерінің айтуынша, жүргізушінің қоғамдық көліктегі тәжірибесі 25 жылды құрайды. Рейс алдындағы медициналық тексеруден бүгін сағат 06:00-де өткен. 2019 жылы біліктілікті жоғарлату орталығында оқыған.
