Көлік полицейлері жүк пойызымен үйіне дейін жетпек болған 21 жастағы жігітті әкімшілік жауапкершілікке тартты деп хабарлайды QazPulse тілшісі Polisia.kz сайтына сілтеме жасап.
21 шілдеде Шамалған станциясындағы желілік полиция бөлімшесіне электровоз машинисінен жүк пойызы вагондарының бірінде бөгде адамның отырғандығы туралы хабарлама келіп түскен. Содан, Шамалған станциясы бойынша кезекшінің нұсқауымен құрам тоқтатылған.
«Құқықбұзушы қашып кетпекші болғанымен, көлік полицейлерінен қашып құтыла алмады», – дейді көліктегі полиция департаменті бастығының бірінші орынбасары Қалижан Қобландин.
Тексеру барысында тәртіп сақшылары Жамбыл облысының 21 жастағы тұрғынын анықтады. Ол Отар станциясына үйіне дейін жүк пойызымен жетіп алмақ болған. Оған қатысты ҚР ӘҚБтК 560-бабының 1-бөлігі, яғни, жүк поездарында заңсыз жүрiп-тұру, поезд жүрiп бара жатқанда отырғызу және түсiру, вагондардың тепкiшектерi мен төбесiнде жүрiп-тұру, қажетсiз ретте поезды заңсыз тоқтату бойынша әкімшілік хаттама толтырылып, 5 АЕК көлемінде айыппұл салынды.
Еске сала кетсек, өткен жылы күзде Шамалған станциясындағы теміржол өткелінде пойыз бен автобус соқтығысып, автобус жүргізуші қаза тапты.
