Дүние есігін ашқан сәбидің салмағы 3 келі 800 граммды құрап отыр деп хабарлайды QazPulse тілшісі. Осылайша Павел мен Татьяна Култышевтардың 9 ұлы және 7 қызы бар. Атап өтерлік жайт, балалардың бәрі бір кіндіктен тараған.
Шағын шеберханасы бар Павел бос уақытында ұлдарын еңбекке баулуда.
«Өзім дәнекерлеушімін. Білгенімді әркез балаларыма үйретемін. Себебі жақсы тәрбие беріп, оларды еңбекке баулу – менің басты міндетім. Өзім де көпбалалы отбасыданмын. Біз сегіз ағайындымыз», – дейді осыған дейін отандық бұқаралық ақпарат құралдарының біріне берген сұхбатында Павел Култышев.
Татьяна болса, балаларын бөліп жармайтынын айтады.
«Барлығына құшағымды айқара ашып, ана махабатын сыйлауға тырысамын. Әрине бағып-қағуда аздаған қиындықтар бар. Бірақ, бастысы ол емес. Маңыздысы – олардың бақытты күлкісі. Қазір балапандарымызды қатарынан кем қылмай өсіріп келеміз. Ешкімнен көмек сұрағанымыз жоқ», – дейді Татьяна.
Еске салайық, бұған дейін, ҚР еңбек және халықты әлеуметтік қорғау министрі Біржан Нұрымбетов 7 және одан көпбалалы отбасыларға жәрдемақы енгізілгенін мәлімдеген болатын. Оның айтуынша, енді 8 және одан да көпбалалы отбасыларға біркелкі жәрдемақы беріледі. Мысалы, 8 балаға 85 мың теңге, 10 бала 106 мың теңге, 15 балаға 159 мың теңге төленеді.
Нәтижесінде Петропавлдағы көпбалалы отбасының қолына, келесі шілде айынан бастап, айына 177 792 теңгеге дейін тиюі мүмкін. Бүгінгі таңға дейін жәрдемақы тек 7 балаға дейін, 78 мың теңге маңайында төленіп келді.
1 маусымдағы дерек бойынша, жыл басынан бері, Қазақстанда ана мен баланы әлеуметтік қолдауға 190 млрд теңге бөлінді.
