Қазақстанда Ресей мен Беларусь одақтық мемлекетіне қосылатын жоспар жоқ, ынтымақтастық тек екіжақты түрде және Еуразиялық экономикалық одақ, ТМД сияқты ықпалдастық бірлестіктері аясында жүреді. ҚР Президенті Қасым-Жомарт Тоқаев ресейлік басылымға сұхбат берді деп хабарлайды QazPulse тілшісі.
«Тұңғыш Президент Нұрсұлтан Назарбаев – тарихи тұлға, қазіргі Қазақстанның іргетасын қалаушы. Жақын арада (6 шілде) оның 80 жылдық мерейтойын атап өтеміз», – деп ойын білдірген Мемлекет басшысы елде билікке таластың жоқтығын, Нұрсұлтан Әбішұлының өзі бүгінгі Президент маңайына топтасуға шақырғанын атап өтті.
Журналистердің Қазақстандағы орыс ұлтының қаншалықты қорғалғаны жайлы сұрағына Қасым-Жомарт Кемелұлы, елдегі 3,5 миллионнан астам орыс ұлты өкілдерінің басқа да азаматтар сияқты барлық заңды құқығын қолдана алатынын айтты.
Елдімекендер атауын ауыстыруда, Президенттің пікірінше, бірқатар ауыл-кенттер мен көшелер өз тарихымен қайта қауышуда, кеңес үкіметінің қисынсыз мұрасы келмеске кетіп жатыр. Конституция бойынша, орыс тілі ресми түрде, мемлекеттік органдарда қолданылуда. Ал, кейбір сарапшысымақтардың тері пиғылына қарамастан, Қырым мен Донбасс сценариінің қайталануына үзілді-кесілді жол берілмейді.
«Қазақ әліпбиін жаңғыртуға қазақ тілінің коммуникациялық мүмкіндіктерін кеңейту мақсаты арқау болып отыр. Алайда латыншаға біртіндеп, жасанды асығып-үсігусіз, Орталық Азияда қалыптастан тәжірибені ескере көшетін боламыз», – деді Президент.
Мемлекет басшысының сөзінен келесі мәселелер жөнінде қысқа да нұсқа келтірер болсақ, Қытай экспансиясы қаупі мен шынайы іс жүзіндегі жағдай сәйкес келмейді. Сауда-экономикалық және инвестициялық ынтымақтастықты дамыту өзара келісімде жүргізілуде. Қазақстан аумағында АҚШ әскери базасы салынбайды.
