ҚР Индустрия және инфрақұрылымдық даму министрлігі Автомобиль жолдары комитетіне қарасты Жол активтері сапасының ұлттық орталығы республикалық маңызға ие автомобиль жолдарын құралдық мониторингтен өткізу, жолдардың нақты жағдайына баға беру шараларына кірісті деп хабарлайды QazPulse тілшісі.
Жыл соңына дейін Орталық автожолдардың 4665 шақырымын құралдық мониторингтен өткізбек. Осылайша «Жол активтерін басқару жүйесіне» жолдардың орналасқан орындары, геометриялық параметрлері, жол құрылымдары, жол белгілері мен таңбалары, көлік ағымының қарқындылығы мен құрамы біріктірілмек. Бұдан бөлек, жолдардың техникалық жағдайы анықталып, олқылықтар туралы деректер жиналған тізімдеме жасалады. Бүгінге дейін жолдардың 819 шақырымы диагностикадан өткізілген.
Сонымен қатар, мамандар республикалық маңызы бар тасжолдардың 11 680 шақырымының нақты жағдайына бағасын бермек. Осы ретте қауіпсіздік бойынша жолдардың рейтингі құрылмақ. Жаңа техникалық құралдармен, жолдарды зерттеуге арналған аспаптармен жабдықталған жол зертханалары бүгінге дейін жолдардың 1144 шақырымын зерттеуден өткізіп үлгерген.
«Жолдарды диагностикадан өткізу кезінде заманауи цифрлық жабдықтар қолданылатынын айта кету керек. Ол құралдар жұмысты тез әрі сапалы жүргізуге, автомобиль жолдары мен жасанды құрылымдардың жағдайы туралы толық мәлімет алуға мүмкіндік береді. Бұл өз кезегінде жөндеу жүргізілмеген проблемалық жол телімдерін анықтауға үлкен көмегін тигізеді», – дейді министрлік өкілдері.
