Ішкі нарықты жеке қорғану құралдарымен қамтамасыз ету үшін Қазақстанда медициналық бетперде шығаратын төрт кәсіпорын ашу жоспарланып отыр деп хабарлайды QazPulse тілшісі.
Тұтастай алғанда халықтың маскаға деген қажеттілігі жарты жыл ішінде 144 млн дананы құраған.
«Бүгінгі таңда тоғыз отандық кәсіпорынның қуаттылығы тәулігіне 490 мың дана медициналық маска шығаруға мүмкіндік береді. Өндіріс көлемін ұлғайту мақсатында осы жылдың соңына дейін төрт жаңа кәсіпорын ашуды жоспарлап отырмыз», — деді Үкімет отырысында индустрия және инфрақұрылымдық даму министрі Бейбіт Атамқұлов.
Осы жобаларды іске қосу және жұмыс істеп тұрған кәсіпорындардың өндіріс көлемін ұлғайту тәулігіне 1,1 млн дана маска шығаруға мүмкіндік береді.
Халықты қажетті маскалар санымен қамтамасыз ету үшін министрлік тігін кәсіпорындары есебінен көп мәрте қолданылатынмаскалардың өндіріс көлемін тәулігіне 800 мың данаға дейін ұлғайтпақшы. Жергілікті атқарушы органдар тігін кәсіпорындарымен көп мәрте қолданылатын маскалар қорын құру бойынша жұмысты бастады.
Бұдан басқа, тәулігіне 460 мың жұп қолғап, айына 800 мың данаға қорғаныш костюмін шығару жоспарлануда.
