Биыл 31 шілде, яғни коронавирус індетіне байланысты елімізде жарияланған карантин уақытында болатын мұсылмандардың ұлық мерекесінің басты рәмізі – құрбандықты онлайн шалуға болады деп хабарлайды QazPuLse тілшісі Қазақстан мұсылмандарының діни басқармасына сілтеме жасап.
Ол үшін мүфтият жақын арада арнайы сайт ашып, Qurban2020.muftyat.kz деп аталатын оны «Зекет» қоры техникалық жағынан жүргізіп отырмақ.
«Аталған сайт арқылы Сіз ешқайда бармай құрбандық шалуға онлайн тапсырыс бере аласыз. Жұмыстың атқарылу барысы туралы тапсырыс берушіге мағлұмат беріледі. Ең алдымен қазіргі пандемия жағдайында Сізге ешқандай байланысқа түспей, құрбандығыңызды қашықтан шалуға мүмкіндік жасалады», – дейді діни басқарма өкілдері.
Жаңа сайттың тағы бір артықшылығы, мұнда құрбандыққа шалынатын төрт түлік бағасымен қоса көрсетіледі. Сол жерден қажетті малды таңдап, тапсырыс бересіз. Ал сойылған малдың еті түгелдей қайырымдылыққа, яғни мұқтаж жандарға үлестірілмек.
