Әлеуметтік желіде өңірлік төтенше жағдай құрылымдары бір-бірінен іліп әкетіп жатқан челленджде нәзік жандар талдырмаш бойларына, қыпша белдеріне қарамастан былайғы кезде ауыр да ыңғайсыз арнайы құтқару киімін жылдам киіп, өзге де әрекеттерді тез орындайды деп хабарлайды QazPulse тілшісі.
Ер азаматтармен қатар адам өміріне араша түсетін, азаматтық қорғаныс саласындағы қауіпті де жауапты іске жұмылған олар өжет те әбжіл қимылымен таңғалдырады. Мысалы ақтөбелік әріптестері Луиза Тасмағамбетовадан эстафетаны қабыл алған Қарағандыдағы өрт сөндіру мекемесінің радиотелефонистері Айкүміс Сындарбекова мен Ғали-Бану Рақышевалар көмекке мұқтаж жанды қалай биіктен жерге еш жарақатсыз табыстау керектігін көрсетеді.
