Қазақстандық түрмелерде отырған адамдарды мекеме қызметкерлерімен сыпайы болуға үйретпек, деп хабарлайды QazPulse тілшісі.
Сотталғандардың мекеме қызметкерлерімен амандасқан кезде қалай және не айтатыны бүгінде заңда жазылмаған. Сондықтан олар қарауылшылармен «Саламалейкум», «Салам», «Привет» деп емін-еркін сөйлесе береді. Тіпті, қолдарын қалтасына салып, аяқтарын талтайтып тұрады екен. Ал мекеме қызметкері ескерту жасаса, тұтқындар олардың үстінен шағым түсіретінді шығарыпты.
Осыған байланысты, сотталғандармен амандасу тәртібін реттеу бөлігінде ережеге өзгерістер енгізу қажеттілігі туындаған.
«Мекеме қызметкерлерімен, сотталғандардың мінез-құлқын бақылау мен қадағалауды жүзеге асыруға уәкілетті адамдармен және мекемелерге барған басқа да лауазымды адамдармен кездескен кезде сотталғандардың орнынан тұруы немесе тоқтауы, аяқтарын қосып, қолдарын тігінен қоюы және олармен «Сәлеметсіз бе» немесе «Здравствуйте» деп амандасуы қажет. Бұл ретте қол алысуға болмайды», – деп көрсетілген «Қазақстан Республикасы Ішкі істер министрінің кейбір бұйрықтарына өзгерістер мен толықтырулар енгізу туралы» жоба нұсқасында.
Жоба 16 маусымға дейін қоғамдық талқылауға ұсынылды. Сосын депутаттарға жолданатын болады.
