Алматы облысы төтенше жағдай департаментінен QazPulse тілшісіне хабарлағандай, қайықтағыларға (понтон) көмектің қажет екендігін туыстары түнгі сағат 22-ден кейін айтқан. Қуаныштысы сол, Қапшағай су қоймасындағы құтқару операциясы сәтті аяқталды.
Белгілі болғандай, Қапшағай қаласының оңтүстік-батыс жағалауында орналасқан демалыс базасында 1979 жылғы әкесі мен 2008 жылғы ұлы тәуліктің қараңғы уақытында 2,5Х3 м өлшемді қолдан жасалған 2 ескекпен басқарылатын аумақта жүзіп жүрген. Содан желмен су қоймасына алып кеткен.
Сағат 23.00-де жағадан екі шақырым жерде желмен суға алып кеткендер табылып, құтқарушылар оларды жағаға жеткізді.
«Айта кету керек, құтқарылғандар суда қауіпсіздік ережелерін бұзды, тәуліктің қараңғы уақытында су айдынына шыққан. Дегенмен құтқару кеудешелерін киіп қауіпсіз күйге енуге тырысқан және өздерімен бірге құтқару шеңберлері болған», дейді департамент өкілдері.
Құтқарушылар келесі қауіпсіздік қағидаларын қатаң сақтауды ұсынады:
– түнгі уақытта және желді ауа райы кезінде суға түспеу және суға шықпау;
– сертификатталмаған жүзу құралдарында жүзбеу;
– жағадан алыс жүзуге болмайды;
– балаларды үлкендердің қарауынсыз су жанында қалдырмаңыз;
– жүзу құралдарында су айдынына шығу кезінде құтқару кеудешелерін кию.
