Өткен демалыс күндері елімізде балалар зардап шеккен 9 оқиға орын алды деп хабарлайды QazPulse тілшісі. Салдарында 5 бала көз жұмып, 6 бала ауруханаға жатқызылды.
Мәселен кеше, яғни 14 маусым күні Шығыс Қазақстан облысы Абай ауданы Қасқабұлақ ауылынан 8 шақырым жерде атқа мініп мал бағып жүрген 2004 жылғы жасөспірімге найзағай оты түскен. Осы күні Қызылорда облысы Шиелі ауданы Балаби ауылында жекеменшік үйдің ауласында электр ұзартқышпен ойнаған 4 жасар баланы тоқ соғып, ауруханада қайтыс болған.
13 маусым күні Көкшетау қаласында пәтердегі өрт ауыздықталған.
«Өрт орнынан 3 бала ауруханаға жеткізіліп, біреуі сонда қайтыс болды. Балалар ересектердің қарауынсыз қалған. Өрт себебі анықталуда. Төтенше жағдай департаменті мен полиция басқармасынан 32 қызметкер мен 6 бірлік техника оқыс оқиғаға жұмылды», – деп хабарлайды ҚР ІІМ Төтенше жағдай комитетінен.
13 маусым күндіз Шымкент қаласы Абай ауданындағы Самал шағын ауданында 1 жасар бала 25 литрлік ыдыстағы суға тұншығып өлген. Атырау қаласында кешкілік уақытта 7 жасар қыз 2 метр тереңдіктегі шұңқырға құлап, тіл тартпай кеткен.
Балалардың көпқабатты үйдің терезесінен құлау дерегі бірнеше өңірде қайталанып отыр.
Осылайша мамандар ересектердің ескеруінсіз қалған балаларға байланысты оқиғаларға алаңдаушылық танытып, әр ата-ана балаларды сақтандыру жолын білуі керек деп санайды.
