Қызылорда облысында сотталғандар 50 мың дана бетперде тікті деп хабарлайды QazPulse тілшісі Polisia.kz сайтына сілтеме жасап.
Елімізде коронавирус инфекциясының белең алуына байланысты, Қызылорда қаласындағы ЗК-169/5 мекемесіндегі сотталғандар белсенді түрде бетперде тігіп жатыр.
Бұл бетперделерді ЗК-169/5 мекемесінің аумағындағы РГП “Еңбек-Қызылорда” тігін цехында арнайы кәсіби білімі бар сотталғандар тігуде. Қазіргі таңда 45-ке жуық сотталған екі ауысымда бетперде тігіп жатыр. Биыл наурыз айынан бері 50 мыңға жуық көпреттік бетперде дайындалған. Әр сотталушы әуел баста 5-10 бетперде шығарса, қазір күніне 50-60 бетперде әзірлейді. Ал тәулігіне 2 мың дана тігіледі.
Тігіліп жатқан бетперделер облыстағы мекемелердің тапсырысы негізінде дайындалуда. Бұан бөлек жазасын өтеп жатқандардың да қауіпсіздігі қамтамасыз етіліп, қорғаныс заттар таратылып тұрады.
ЗК-169/5 мекемесінде жазасын өтеп жатқан Асқар есімді ер адам тігінші мамандығын оқып, диплом алған. Бүгінде мекеменің өндірістік аумағындағы “Тігін цехында” жұмыс істейді. Қазір өз ісінің шебері.
«Осындай қиын уақытта “Жұмыла көтерген жүк жеңіл” демекші, халқыма қолымен келген көмегімді аянып жатқаным жоқ. Бір бетпердені тігу үшін небәрі 5-10 минут уақыт кетеді. Күніне 50 дана бетперде тігемін. Айлық жалақымызды уақытылы алып отырмыз. Елім осы індетті жеңіп, мен де отбасыма аман есен оралсам деймін», – дейді ол.
