Петропавл қаласының тұрғыны кешкісін үйінің терезелері сынғанын, екі есік бұзылғанын байқайды деп хабарлайды QazPulse тілшісі. Үйге кірген соң, ол, ақша мен “Acer” ноутбугінің жоғалғанын аңғарады.
Келтірілген шығын сомасы 170 мың теңгені құрады. Үй иесі дереу “102” арнасына хабарласқан. Петропавл қаласының полиция басқармасы, бірінші полиция бөлімінің криминалдық полиция бөлімшесінің қызметкерлері күдіктілерді “ізін суытпай” ұстады. Олар 1992 және 1999 жылдары туған екі қала тұрғыны болып шықты. Үлкенінің өтелген соттылығы бар.
«Жігіттер келесі күні-ақ барлығын тауып берді, – деп хабарлайды, тәртіп сақшыларының жылдам әрекетіне таң қалған жәбірленуші. – Бізде жақсы полиция қызметкерлерінің болғаны игі, криминалдық полиция командирлері мен қызметкерлеріне және тергеушілерге алғыс білдіремін».
СҚО Полиция департаменті бастығының орынбасары Руслан Назаровтың айтуынша, күдіктілерді жедел анықтауға кәсіпкерлер мен аудан тұрғындарының жеке қаражатына орнатылған бейнебақылау камераларының көмегі тиді.
«Дүкендер мен жекеменшік үйлердің иелері орнатқан бейнекамералар олардың меншіктерін қылмыстық қолсұғушылықтан қорғап қана қоймай, басқа да қылмыстарды ашуға септігін тигізеді, – деді Руслан Назаров. – Жекеменшік үйлердің тұрғындары үйлерін техникалық нығайтуды ойлағаны жөн, бұл қаскөйлерді үйге заңсыз еніп, ұрлық жасаудағы райынан қайтарады. Тұрғын жайға заңсыз енумен жасалған ұрлық ауыр санатқа жатады, оларды ашу облыстық полиция басшылығының ерекше бақылауында».
Биыл жылдың басынан Солтүстік Қазақстан облысында тіркелген 303 пәтер ұрлығының 86,9%-ы ашылған.
